ابوظہبی: متحدہ عرب امارات نے 100 درہم کا نیا کرنسی نوٹ متعارف کروا دیا ہے جس کا مقصد سکیورٹی میں مزید اضافہ کرنا ہے۔ یہ نوٹ کاغذ کی بجائے پالیمر سے تیار کیا گیا ہے اور اس میں جدید ٹیکنالوجی کا استعمال کیا گیا ہے تاکہ جعلی نوٹوں کی روک تھام کی جا سکے۔
اماراتی مرکزی بینک کے مطابق اس نوٹ میں اسپارک فلو ڈائیمنشنز اور کائینگرام کلرز جیسے جدید سکیورٹی فیچرز شامل ہیں۔ نوٹ کا ڈیزائن سرخ رنگ کے مختلف شیڈز میں ہے جس میں ام القیوین کا تاریخی قلعہ، فجیرہ پورٹ اور اتحاد ریل کی تصاویر شامل ہیں۔ اس نوٹ پر بریل علامات بھی ہیں تاکہ بصارت سے محروم افراد کے لیے اس کی مالیت شناخت کرنا آسان ہو۔
مرکزی بینک نے وضاحت کی ہے کہ 100 درہم کا پرانا نوٹ بھی قابل استعمال رہے گا۔
