واشنگٹن : امریکی صدر ڈونلڈ ٹرمپ نے کہا ہے کہ قومی سلامتی کے اعلیٰ عہدیداروں کی خفیہ چیٹ میں کوئی حساس معلومات افشا نہیں کی گئیں، اور حوثیوں پر حملوں سے متعلق چیٹ میں بھی کوئی خفیہ مواد شامل نہیں تھا۔
وائٹ ہاؤس میں میڈیا سے گفتگو کرتے ہوئے ٹرمپ نے کہا کہ اس چیٹ کی تحقیقات ایف بی آئی کا مسئلہ نہیں ہے اور قومی سلامتی کے مشیر بہترین کام کر رہے ہیں، انہیں معافی مانگنے کی ضرورت نہیں۔
ٹرمپ نے مزید کہا کہ امریکا کے پاس بہترین سگنل ٹیکنالوجی موجود ہے اور یوکرین کے معاملے میں پیشرفت ہو رہی ہے، اسی طرح مشرق وسطیٰ سے متعلق بھی معاملات بہتر ہو رہے ہیں۔ روس سے پابندیاں ہٹانے کی درخواست پر بھی غور کیا جائے گا، جبکہ بلیک سی ڈیل کے لیے شرائط کا جائزہ لیا جا رہا ہے۔
واضح رہے کہ امریکی صدر کی انتظامیہ کو اس وقت مزید مسائل کا سامنا ہے جب "دی اٹلانٹک" میں شائع ہونے والے ایک آرٹیکل میں یہ انکشاف کیا گیا کہ ایک گروپ چیٹ میں امریکی حکومتی اعلیٰ عہدیدار یمن میں بمباری کے منصوبوں پر بات کر رہے تھے اور اس چیٹ میں ایڈیٹر انچیف جیفری گولڈ برگ کو بھی شامل کیا گیا تھا۔