جے پور، بھارت میں نئے زرعی قوانین کیخلاف کسان تحریک زور شور سے جاری ہے، ملک گیر ہڑتال میں کئی علاقوں میں مظاہرین نے ٹرینیں روک دیں۔
تفصیلات کے مطابق ریلوے کے سرکاری ذرائع کا کہنا ہے کہ ریواڑی، حصار، چرکھیداری، مانہرو، بھیوانی، باملہ ریلوے ڈویژن کے درمیان کسان تحریک کی وجہ سے ٹرین کی نقل و حرکت متاثر ہوئی ہے۔
اس کے علاوہ ملک کی اہم شاہراہوں اورسڑکوں پر ٹریفک جام کے باعث شہری نظام درھم برھم ہوگیا، گاڑیوں کی طویل قطاریں لگ گئیں، اس موقع پر پولیس اہلکاروں کی بڑی تعداد بھی موجود تھی ۔
بھارت میں زرعی قوانین کی مخالفت میں کسانوں کی ملک گیر ہڑتال کا اثر واضح دکھائی دے رہا ہے، پنجاب کے کئی مقامات پر مشتعل کسان ریلوے ٹریک پر بیٹھ گئے جس کے باعث محکمہ ریلوے کو 31 ٹرینوں کو روکنا پڑا۔ دہلی کی جانب سے آنے والی چار ریل گاڑیوں کی روانگی منسوخ کر دی گئی۔
دوسری جانب مرکزی حکومت کے خلاف کسانوں کی جانب سے کی جانے والی ہڑتال کے پیش نظر جھاڑ کھنڈ میں گاڑیوں کی آمد و رفت شدید متاثر ہوئی ہے، اہمم شاہراہیں بند کیے جانے کی وجہ سے سڑکوں پر ٹریفک جام ہوگیا۔
یا د رہے کہ کسان تنظیموں نے آج 26 مارچ کو مکمل طور سے ملک گیر ہڑتال کا اعلان کیا ہے، اس موقع پر ملک کے کئی حصوں میں ٹرینوں اور ٹریفک کی نقل و حمل متاثر ہوئے اور ساتھ ہی اس کا اثر بازاروں پر بھی پڑا۔