اترپردیش: چشمے کے بغیر اخبار پڑھنے میں ناکامی پر دلہن نے شادی سے انکار کردیا ۔
یہ واقعہ بھارتی ریاست اتر پردیش میں پیش آیا جہاں ایک دلہن نے شادی کی تقریبات کے دوران دلہے کی نظر کو چیک کرنے کے لئے اخبار پڑھنے کا کہا لیکن اس کی نظر اتنی کمزور تھی کہ وہ چشمے کے بغیر اخبار پڑھنے میں ناکام رہا ۔
اتر پردیش کے علاقے صدر کوتوالی میں قصبہ جمال پور کی ’ارچنا‘ اور قصبہ بنشی کے ’شیوم‘ کی شادی طے ہوگئی تھی اور دونوں کے گھر والے تیاریوں میں مصروف تھے۔
شادی کی تقریبات میں دلہن کے گھر کی عورتوں نے دیکھا کہ دولہا نے زیادہ تر وقت چشمہ لگایا ہوا تھا جس پر انہیں اندازہ ہوا کہ شاید وہ چشمے کے بغیر ٹھیک سے نہیں دیکھ سکتا۔
رشتہ طے کرتے وقت لڑکے والوں نے یہ بات نہیں بتائی تھی، لہذا ان عورتوں نے عین شادی والے دن دولہا کا ’’امتحان‘‘ لینے کا فیصلہ کیا۔
بارات کے وقت لڑکے سے کہا گیا کہ وہ چشمہ اتارے اور اخبار پڑھ کر دکھائے، لیکن چشمہ اتارنے کے بعد لڑکے کو بہت دھندلا دکھائی دینے لگا اور وہ اخبار نہیں پڑھ سکا۔
اس امتحان میں دولہے کی ناکامی کے بعد دلہن اور اس کے گھر والوں نے شادی ختم کردی اور بارات واپس بھیج دی۔
اس کے بعد انہوں نے مقامی تھانے میں دولہا کے گھر والوں کے خلاف شکایت بھی درج کروا دی جس میں کہا گیا تھا کہ انہیں دولہا کی اس ’’خرابی‘‘ کے بارے میں نہ بتا کر دھوکا دیا گیا جبکہ دولہا والے شادی کے انتظامات پر دلہن والوں کے اخراجات کی رقم، جہیز میں دی گئی بھاری نقدی اور دولہا کےلیے موٹر سائیکل سمیت دوسرا تمام ساز و سامان واپس کرنے سے انکاری ہیں۔
شکایت درج کرنے سے پہلے مقامی پولیس نے یہ مسئلہ بات چیت سے حل کرنے کی کوشش بھی کی لیکن دولہا والوں کے تعاون نہ کرنے پر پولیس میں باقاعدہ ایف آئی آر درج کرلی گئی۔
لڑکی کے والد ارجن سنگھ نے کہا کہ ہمیں بالکل بھی اندازہ نہیں تھا کہ لڑکے کی نظر اتنی کمزور ہوگی۔ جب میری بیٹی کو اس بارے میں پتا چلا تو اس نے فوراً شادی منسوخ کرنے کا فیصلہ کیا اور ہم نے بھی اس کا ساتھ دیا۔
