اسلام آباد: حکومت نے زرعی ٹیوب ویل اور 300 یونٹ تک بجلی استعمال کرنے والے صارفین کے لیے بڑی خوشخبری سنادی۔
پاور ڈویژن کے مطابق ماہانہ فیول ایڈجسٹمنٹ میں کمی کا فائدہ اب زرعی ٹیوب ویل اور 300 یونٹ بجلی استعمال کرنے والے صارفین کو بھی ملے گا، جس سے ان کے ماہانہ بلوں میں نمایاں کمی آئے گی۔
واضح رہے کہ جون 2015 سے 300 یونٹ تک بجلی استعمال کرنے والے گھریلو صارفین کو فیول ایڈجسٹمنٹ میں کمی کا فائدہ روک دیا گیا تھا جبکہ دسمبر 2010 سے زرعی ٹیوب ویل صارفین کے لیے یہ سہولت ختم کردی گئی تھی۔
پاور ڈویژن نے اس حوالے سے نیشنل الیکٹرک پاور ریگولیٹری اتھارٹی (نیپرا) کو باضابطہ خط لکھ دیا ہے، جس میں تجویز دی گئی ہے کہ فیول کاسٹ میں کمی کا فائدہ ان صارفین کو فوری طور پر فراہم کیا جائے۔
حکومت کے اس فیصلے سے زرعی شعبے کو ریلیف ملے گا جبکہ 300 یونٹ تک بجلی استعمال کرنے والے صارفین کے ماہانہ بجلی بلوں میں مزید کمی آئے گی۔
