لاہور: رمضان المبارک کی آمد سے قبل صوبائی دارالحکومت میں اشیائے خورونوش کی قیمتوں میں اضافہ ہو گیا۔
شہر کے مختلف علاقوں میں دودھ، دہی، چینی اور گوشت کی قیمتیں بڑھ گئی ہیں۔ گزشتہ پندرہ دنوں میں چینی کی قیمت 150 روپے سے بڑھ کر 160 روپے فی کلو ہو گئی ہے۔ دودھ کی قیمت میں 20 روپے اضافے کے بعد 180 روپے سے 220 روپے فی کلو جبکہ دہی 200 روپے سے بڑھ کر 240 روپے فی کلو ہو گیا ہے۔
مٹن 1,600 روپے کی بجائے 2,200 روپے فی کلو میں فروخت ہو رہا ہے، جبکہ بیف کی قیمت 800 روپے سے بڑھ کر 1,100 روپے فی کلو ہو گئی ہے۔ رمضان سے قبل شربت کی بوتل کی قیمت میں 50 روپے اضافے کے بعد 470 روپے ہو گئی ہے۔
سبزیوں کی قیمتوں میں بھی اضافہ دیکھنے میں آیا ہے، 15 روز قبل 45 روپے میں فروخت ہونے والا آلو 60 روپے فی کلو تک پہنچ گیا، جبکہ لیموں کی قیمت میں 100 روپے اضافے کے بعد اوپن مارکیٹ میں 200 روپے فی کلو فروخت ہو رہا ہے۔
شہریوں نے انتظامیہ سے مہنگائی پر قابو پانے اور قیمتیں کنٹرول کرنے کا مطالبہ کیا ہے۔
