راولپنڈی: قومی کرکٹ ٹیم کے عبوری ہیڈ کوچ عاقب جاوید نے کہا ہے کہ قومی ٹیم میں شامل ہر کھلاڑی نے پرفارمنس کی بنیاد پر جگہ بنائی ہے اور ایسا ممکن نہیں کہ جو ہار جائے انہیں بدل کر انڈر 19 ٹیم کے کھلاڑیوں کو شامل کر لیا جائے۔
راولپنڈی میں پریس کانفرنس کرتے ہوئے عاقب جاوید نے کہا کہ ٹیم کی پرفارمنس میں کمی آرہی ہے، لیکن یہ حقیقت ہے کہ کھلاڑی اس سے زیادہ افسردہ ہیں کیونکہ جب ٹیم توقعات کے مطابق نہیں کھیلتی تو سب سے زیادہ دکھ کھلاڑیوں کو ہوتا ہے۔ انہوں نے بھارتی ٹیم کے تجربے کو سراہتے ہوئے کہا کہ 240 رنز کا دفاع کرنا ایک بڑا چیلنج تھا اور بھارت کے خلاف میچ میں صرف پلاننگ کافی نہیں ہوتی، بلکہ اس کے لیے ایک مضبوط اٹیک اور وکٹیں حاصل کرنا ضروری ہوتا ہے۔
عاقب جاوید نے ٹیم سلیکشن کے حوالے سے بات کرتے ہوئے کہا کہ سلیکشن کمیٹی کا کام بہترین کھلاڑیوں کو منتخب کرنا ہے اور موجودہ ٹیم ممکنہ بہترین ٹیم تھی۔ انہوں نے کہا کہ "مطمئن کبھی نہیں ہو سکتے، لیکن یہ ٹیم ہماری سوچ کے مطابق ہی تھی، جس میں ہر کھلاڑی نے پرفارمنس کی بنیاد پر جگہ بنائی تھی۔"
انہوں نے مزید کہا کہ ٹیم کی کارکردگی میں کمی آنا ایک حقیقت ہے، مگر اس پروسیس کو بہتر بنانے کی کوشش جاری رکھی جائے گی۔ عاقب جاوید نے کہا کہ وہ اور سلیکشن کمیٹی اب ٹیم کو اگلے میچ کے لیے تیار کرنے میں مصروف ہیں اور اپنی پوری کوشش کریں گے تاکہ مستقبل میں بہتر نتائج حاصل کیے جا سکیں۔
آخر میں انہوں نے اس بات پر زور دیا کہ ہارنے والے کھلاڑیوں کو بدل کر انڈر 19 کھلاڑیوں کو ٹیم میں لانا درست نہیں، بلکہ موجودہ ٹیم کی طاقت کو بڑھا کر اگلے میچز کے لیے ان کی کارکردگی بہتر بنانا ضروری ہے۔
