کابل : افغانستان کے دو صوبوں میں شدید بارشوں، سیلاب اور ژالہ باری کی وجہ سے تباہی کا سامنا ہے، جس کے نتیجے میں کم از کم 29 افراد جاں بحق ہوگئے ہیں۔ غیر ملکی خبر رساں ایجنسی کے مطابق افغان حکام نے تصدیق کی ہے کہ مغربی صوبہ فراہ میں ژالہ باری کے باعث 21 افراد جاں بحق اور 6 دیگر زخمی ہوئے۔ جاں بحق ہونے والے افراد میں دو خاندان شامل ہیں جو سیر و تفریح کے لیے گئے تھے۔
دوسری جانب، جنوبی قندھار میں شدید بارشوں کے نتیجے میں 8 افراد، جن میں خواتین اور بچے بھی شامل ہیں، جاں بحق ہوئے۔ حکام کے مطابق قندھار میں 4 خواتین جو کپڑے دھونے میں مصروف تھیں، سیلابی پانی میں بہہ گئیں، جس میں صرف ایک خاتون زندہ بچ سکی، جبکہ ایک بچہ بھی ڈوب کر جاں بحق ہوگیا۔ ایک چھت گرنے سے بھی ایک خاتون اور تین بچے جاں بحق ہوئے۔
افغانستان کو موسمیاتی تبدیلیوں کے لحاظ سے چھٹا سب سے زیادہ متاثرہ ملک قرار دیا گیا ہے۔ اقوام متحدہ نے 2023 میں کہا تھا کہ افغانستان میں خشک سالی، سیلاب، زمین کی تباہی اور زرعی پیداوار میں کمی اہم خطرات ہیں۔ گزشتہ سال مئی میں بھی سیلاب نے سیکڑوں افراد کی جان لی تھی اور بڑے پیمانے پر زرعی زمینوں کو نقصان پہنچایا تھا۔
