نیویارک : اقوام متحدہ میں پاکستان نے غزہ میں فوری اور مکمل جنگ بندی کی اپیل کرتے ہوئے عالمی برادری سے کہا ہے کہ وہ مقبوضہ فلسطینی علاقوں میں پائیدار امن کے قیام کو ترجیح دے۔ پاکستان کے متبادل مستقل مندوب، عاصم افتخار، نے سلامتی کونسل میں بریفنگ دیتے ہوئے کہا کہ اسرائیل کی جانب سے مغربی کنارے میں جارحیت کو فوراً روکا جائے۔
عاصم افتخار نے کہا کہ انسانی امداد کو ہتھیار کے طور پر استعمال نہیں کیا جا سکتا اور مشرق وسطیٰ میں بدامنی کی اصل جڑ اسرائیل کا غیر قانونی قبضہ ہے۔ انہوں نے عالمی برادری سے مطالبہ کیا کہ وہ مقبوضہ فلسطینی علاقوں میں پائیدار امن کے قیام کے لیے اپنی کوششیں تیز کرے۔
پاکستان کے مندوب نے سلامتی کونسل سے اپیل کی کہ وہ فلسطینیوں کی جبری بے دخلی کے خلاف مضبوط موقف اختیار کرے اور اس مسئلے کے حل کے لیے مستقل اور مؤثر اقدامات کرے۔
