لاہور : وزیر اعظم شہباز شریف نے ایک اہم اجلاس میں دو ٹوک اعلان کرتے ہوئے کہا ہے کہ کسی کو بھی پاکستان کے مفادات اور ترجیحات کے ساتھ کھیلنے کی اجازت نہیں دی جائے گی، اور نہ ہی انارکی پھیلانے کی اجازت دی جائے گی۔
وزیر اعظم کی زیر صدارت ماڈل ٹاؤن میں ہونے والی اس اہم بیٹھک میں ملک کی موجودہ سیاسی صورتحال پر تفصیل سے تبادلہ خیال کیا گیا۔ اجلاس میں وزیر اعظم نے کہا کہ ملک دشمن عناصر نہیں چاہتے کہ پاکستان ترقی کرے، اور اسی لیے ہمیں اپنے اتحاد کو مزید مضبوط کرنا ہوگا۔ انہوں نے کہا کہ پاکستان کے معاشی حالات الحمدللہ دن بدن بہتر ہو رہے ہیں، اور ہمیں اس پیشرفت کو مزید آگے بڑھانے کے لیے سب اتحادیوں کو ساتھ لے کر چلنا ہوگا۔
وزیر اعظم نے پیپلز پارٹی کے مطالبات کو سنجیدگی سے لینے اور جہاں تک ممکن ہو، ان کے حل کی ہدایت کی۔ اس کے ساتھ ہی، اجلاس کے دوران وزیر اعظم نے پاکستان پیپلز پارٹی کے تحفظات دور کرنے کی بھی ہدایت دی، تاکہ پارٹی کے اندر کی سیاسی صورتحال کو بہتر بنایا جا سکے۔
