اسلام آباد: قائد اعظم یونیورسٹی میں سانحہ جعفر ایکسپریس کے متاثرین سے اظہار یکجہتی کے لیے امن واک کا اہتمام کیا گیا۔ یہ واک نیشنل انسٹی ٹیوٹ آف سائیکالوجی کے زیر انتظام کی گئی، جس میں مختلف شعبہ جات سے تعلق رکھنے والے طلبہ نے بڑی تعداد میں شرکت کی۔
امن واک کے دوران طلبہ نے دہشت گردی کے متاثرین کے ساتھ یکجہتی کا اظہار کیا اور بینرز اور پلے کارڈز اٹھا رکھے تھے جن پر "11 مارچ یوم سیاہ" اور "ہم متحد ہیں" جیسے نعرے درج تھے۔ طلبہ نے اس موقع پر قومی یکجہتی اور ہم آہنگی پر زور دیا اور دہشت گردی کے خلاف متحد ہونے کا پیغام دیا۔
واک کے دوران شرکاء نے بلوچستان میں دہشت گردی کی کارروائیوں اور ان کے سہولت کاروں کے خلاف سخت کارروائی کا مطالبہ کیا۔
