نیویارک : اقوام متحدہ نے گزشتہ ہفتے غزہ کے علاقے دیر البلح میں اپنے ہیڈکوارٹر پر ہونے والے حملے کا ذمہ دار اسرائیل کو قرار دیا ہے۔ اس حملے میں اقوام متحدہ کا ایک غیر ملکی اہلکار ہلاک اور پانچ دیگر شدید زخمی ہو گئے تھے۔
اسرائیلی فوج نے اس حملے کے الزامات کو مسترد کرتے ہوئے کہا تھا کہ میڈیا کو غیر مصدقہ رپورٹس پر ذمہ داری سے کام کرنا چاہیے، لیکن اقوام متحدہ نے باضابطہ طور پر اس حملے کا الزام اسرائیلی ٹینکوں پر عائد کیا ہے۔ اقوام متحدہ کے سیکرٹری جنرل کے ترجمان اسٹیفن دوجارک نے کہا کہ 19 مارچ کو دیر البلح میں اقوام متحدہ کے کمپاؤنڈ پر ہونے والا حملہ اسرائیلی ٹینکوں کی جانب سے کیا گیا تھا۔
اس حملے کے بعد اقوام متحدہ نے فلسطینی علاقے میں اپنے غیرملکی عملے کو عارضی طور پر کم کرنے کا فیصلہ کیا ہے۔
یہ بیان ایسے وقت میں سامنے آیا ہے جب اسرائیل نے دوبارہ غزہ پر حملے شروع کیے ہیں، جس کے نتیجے میں تقریباً 700 فلسطینی شہید ہو چکے ہیں، جن میں 400 سے زائد خواتین اور بچے شامل ہیں۔ حماس نے بھی دعویٰ کیا ہے کہ اس کے کئی اعلیٰ رہنما اسرائیلی حملوں میں شہید ہو چکے ہیں۔
