لاہور : وزیراعلیٰ پنجاب مریم نواز شریف نے ”گندم اگاؤ“ انعامی سکیم کے تحت وِیٹ این سینٹیو پروگرام کا آغاز کر دیا ہے، جس کے تحت گندم کے کاشتکاروں کو مفت ٹریکٹر فراہم کیے جائیں گے۔ اس پروگرام کے تحت ایک ہزار ٹریکٹر کاشتکاروں کو دیے جائیں گے۔
مریم نواز شریف نے خود بٹن دبا کر ڈیجیٹل قرعہ اندازی کی، جس کے بعد سب سے پہلا ٹریکٹر بہاولنگر کی خاتون کاشتکار کوثر پروین کے نام نکلا۔ وزیراعلیٰ نے کامیاب کاشتکاروں کو فون کر کے انہیں مفت ٹریکٹر ملنے کی مبارکباد دی، اور ان سے خوشی کا اظہار کیا۔ جھنگ کے کاشتکار محمد اقبال اور منڈی بہاؤالدین کے سلمان احمد کو بھی انہوں نے خود فون کر کے مبارکباد دی اور کہا کہ انشاءاللہ گندم کی فصل اچھی ہوگی۔
بریفنگ کے دوران بتایا گیا کہ ”گندم اگاؤ“ مہم میں ساڑھے بارہ ایکڑ یا اس سے زائد اراضی کے 57,733 کاشتکاروں نے اپلائی کیا، جن میں سے 21,496 کاشتکاروں کو قرعہ اندازی کے لیے اہل قرار دیا گیا۔ ان کامیاب کاشتکاروں کو 55 ہارس پاور کے ٹریکٹر فراہم کیے جائیں گے۔
مزید بتایا گیا کہ پنجاب میں رواں سال 5 لاکھ 60 ہزار ایکڑ اراضی پر گندم کاشت کی گئی، اور تین ماہ کے اندر تمام کامیاب کاشتکاروں کو ٹریکٹر فراہم کر دیے جائیں گے۔
