قاہرہ: مصر نے غزہ میں جنگ بندی کے لیے نئی تجاویز پیش کی ہیں، جو اسرائیل کے غزہ پر دوبارہ فضائی اور زمینی حملے شروع کرنے کے بعد سامنے آئی ہیں۔ غیر ملکی خبررساں ایجنسی کے مطابق، مصر کی تجویز میں حماس سے ہر ہفتے پانچ اسرائیلی یرغمالیوں کی رہائی کا مطالبہ کیا گیا ہے، اور اس کے بعد اسرائیل جنگ بندی معاہدے کے دوسرے مرحلے پر عمل کرے گا۔
سکیورٹی ذرائع کے مطابق، امریکا اور حماس نے اس تجویز کو قبول کر لیا ہے، تاہم اسرائیل کی جانب سے ابھی تک کوئی ردعمل سامنے نہیں آیا۔ حماس کے ایک عہدیدار نے اس تجویز کی تصدیق تو نہیں کی، لیکن یہ کہا کہ مذاکرات کاروں کے ساتھ جنگ بندی کے دوسرے مرحلے پر بات چیت جاری ہے۔
نئی تجاویز میں اسرائیل کے مکمل انخلا کے لیے ایک ٹائم لائن بھی دی گئی ہے، جس کی ضمانت امریکا کی جانب سے دی جائے گی۔ یہ معاہدہ یرغمالیوں کی رہائی کے بدلے طے پائے گا۔
فلسطینی حکام کا کہنا ہے کہ اسرائیل کی جانب سے گزشتہ ہفتے دوبارہ حملے شروع کرنے کے بعد غزہ میں تقریباً 700 فلسطینی شہید ہو چکے ہیں، جن میں 400 سے زائد خواتین اور بچے شامل ہیں، جبکہ حماس کے مطابق اس کے کئی اعلیٰ رہنما بھی ان حملوں میں شہید ہو چکے ہیں۔
