لاہور: ایشین گیمز کے لیے پاکستان ویمن کرکٹ ٹیم کا اعلان کر دیا گیا۔ایشین گیمز سے قبل پاکستان ویمن ٹیم جنوبی افریقا کے خلاف یکم سے 14 ستمبر تک سیریز کھیلے گی۔
ایشین گیمز کے کرکٹ مقابلے رواں سال 19 سے 26 ستمبر تک چین کے شہر ہینگ زو میں منعقد ہوں گے۔ا یشین گیمز کرکٹ مقابلے ٹی20 فارمیٹ کے تحت کھیلے جائیں گے، پاکستانی ویمنز کرکٹ ٹیم آئی سی سی کی عالمی رینکنگ اور ٹورنامنٹ کے قواعدوضوابط کے مطابق ٹورنامنٹ کا آغاز کوارٹر فائنل سے کرے گی جو 22 سے 24ستمبر تک ہونگے، سیمی فائنلز 25 ستمبر کو جبکہ فائنل 26 ستمبر کو ہوگا۔
اسکواڈ میں کپتان ندا ڈار، عالیہ ریاض، انوشے ناصر، ڈیانا بیگ، فاطمہ ثناء، منیبہ علی، ناجیہ علوی، نشرہ سندھو، نتالیہ پرویز، عمیمہ سہیل، صدف شمس، شوال ذوالفقار، سدرہ امین، عروب شاہ اور ام ہانی شامل ہیں۔ 15 رکنی اسکواڈ کا انتخاب ویمنز سلیکشن کمیٹی کے چیرمین سلیم جعفر، ہیڈ کوچ مارک کولز اور کپتان ندا ڈار کی مشاورت سے کیا گیا ہے۔
انڈر19 ویمنز ٹی20 ورلڈکپ اور ایمرجنگ ویمنز ایشیاکپ میں شاندار پرفارمنس پر انوشے ناصر اور شوال ذالفقار کو اسکواڈ کا حصہ بنایا گیا ہے۔ جبکہ ڈیانا بیگ کی بھی ٹیم میں واپسی ہوئی ہے۔ سابق کپتان بسمہ معروف کو اسکواڈ میں شامل نہیں کیا گیا۔
پاکستان کرکٹ بورڈ (پی سی بی) کا کہنا ہے کہ بسمہ معروف ایشین گیمز کے قواعد کے تحت اپنے بچوں کو کھلاڑیوں کے ساتھ رکھنے کی اجازت نہ ہونے کی وجہ سے اسکواڈ میں شامل نہیں۔
واضح رہے کہ پاکستان کی ویمنز ٹیم 2010 ء میں چین میں ہونے والے ایشین گیمز اور پھر2014ء میں جنوبی کوریا میں ہونے والے ایشین گیمز کے کرکٹ مقابلوں میں گولڈ میڈل جیت چکی ہے۔ اب قومی ٹیم کی نظریں ہیٹ ٹرک مکمل کرنے پر مرکوز ہیں۔