کراچی: گورنر سٹیٹ بینک جمیل احمد نے کہا ہے کہ آئندہ برسوں میں حکومت کو قرضوں کی ضرورت کم ہو جائے گی۔
پاکستان بینکنگ سمٹ 2025 کے دوران اپنے خطاب میں انہوں نے کہا کہ بینکوں کو اپنے بزنس ماڈل کا از سر نو جائزہ لینا چاہیے، کیونکہ 2024 میں نجی شعبے کو دیے گئے قرضے 2004 کے مقابلے میں آدھے ہوگئے ہیں۔
انہوں نے بتایا کہ نجی شعبے کے 74 فیصد قرض بڑے کارپوریٹ اداروں کو دیے گئے ہیں۔
جمیل احمد کا کہنا تھا کہ مالیاتی شعبہ موسمیاتی خطرات سے محفوظ نہیں ہے، اس لیے پائیداری کے لیے ریسرچ اور پالیسی پر کام کرنا ضروری ہے۔
انہوں نے بینکاری شعبے کی اہمیت پر زور دیتے ہوئے کہا کہ حکومت اور اسٹیٹ بینک دونوں اس شعبے کو بہت اہمیت دیتے ہیں۔