اسلام آباد : آئی سی سی چیمپئنز ٹرافی میں بھارت کے ہاتھوں شکست کے بعد قومی کرکٹ ٹیم خاموشی سے دبئی سے اسلام آباد پہنچ گئی۔ دبئی سے پرواز کے دوران اس بار غیر معمولی خاموشی دیکھنے کو ملی۔ کھلاڑی آپس میں بات چیت نہیں کر رہے تھے، اور ان کے چہرے پر مایوسی اور غم بھرا ہوا تھا۔
سب سے پہلے قومی ٹیم کا جہاز لاہور پہنچا، جہاں پی سی بی کے چیئرمین سید محسن رضا نقوی اور دیگر بورڈ عہدیدار اترے، پھر جہاز نے دوبارہ اڑان بھری اور اسلام آباد کی جانب روانہ ہوگیا۔ دبئی میں بھارت کے خلاف یکطرفہ شکست کے بعد کھلاڑیوں کے چہرے مرجھا گئے تھے، اور ان کی خاموشی سب کچھ کہہ رہی تھی۔
یہ بھی کہا جا سکتا ہے کہ دبئی میں سفر کے دوران جو گہماگہمی تھی، وہ اب غائب ہو چکی تھی۔ چیئرمین پی سی بی سید محسن رضا نقوی، جو اس سے قبل کھلاڑیوں کے حوصلے بڑھانے کے لیے دبئی پہنچے تھے، اب خاموش اور غمگین تھے۔ وہ بھارت میچ سے پہلے کھلاڑیوں کو عشائیے پر مدعو کرنے اور اسٹیڈیم میں ان کا حوصلہ بڑھانے کے لیے گئے تھے، مگر واپسی پر سب کچھ بدل چکا تھا۔ نہ چہروں پر وہ مسکراہٹ تھی اور نہ ہی وہ گرمجوشی تھی۔
یاد رہے کہ پاکستان نے آئی سی سی چیمپئنز ٹرافی میں نیوزی لینڈ اور بھارت کے ہاتھوں شکست کے بعد ایونٹ سے باہر ہونے کا افسوسناک سفر مکمل کیا ہے۔ تاہم، پاکستان کو اپنا آخری گروپ میچ 27 فروری کو بنگلہ دیش کے خلاف راولپنڈی میں کھیلنا ہے۔ اس وقت گروپ اے سے بھارت اور نیوزی لینڈ نے سیمی فائنل کے لیے کوالیفائی کر لیا ہے۔
