لاہور : پاکستان سمیت دنیا بھر میں کرسمس کی خوشیاں منائی جا رہی ہیں، اور اس موقع پر گھروں، چرچز اور بازاروں کو خوبصورتی سے سجایا گیا ہے۔ پاکستان کے مختلف شہروں میں مسیحی برادری نے کرسمس کی مذہبی اور ثقافتی تقریبات کا اہتمام کیا۔
کراچی میں سینٹ پیٹرک چرچ میں کرسمس کی دعائیہ تقریب منعقد کی گئی جس میں مسیحی برادری کی بڑی تعداد نے شرکت کی۔ حیدرآباد میں بھی سینٹ فرانس چرچ میں دعائیہ تقریب ہوئی اور مٹھائیاں تقسیم کی گئیں، جہاں مسیحی خواتین، بچوں اور نوجوانوں نے ملک کی خوشحالی اور سلامتی کے لیے دعائیں مانگیں۔ فیصل آباد میں مسیحی خواتین نے خریداری کی، جبکہ گوجرانوالا کے کرسمس بازار میں 20 فیصد تک ڈسکاؤنٹ دیا گیا۔
کوئٹہ میں بیکریوں اور کیک شاپس میں کرسمس کے خصوصی کیکس کی دھوم تھی، جبکہ لاہور، سرگودھا اور سکھر میں بھی کرسمس کی خوشیوں میں بھرپور شرکت کی گئی۔ پشاور میں چرچز اور گھروں کو کرسمس ٹریز سے سجا لیا گیا۔ دنیا بھر میں بھی کرسمس کی خوشیاں منائی گئیں۔ ٹیکساس میں ڈرون سے بنے سانتا کلاز نے ہسپتالوں میں بچوں کو تحائف دیے، اور روم میں بازاروں اور شاہراہوں کو روشنیوں سے سجا دیا گیا۔ نیویارک، لندن، پیرس، ٹورنٹو اور میکسیکو میں بھی کرسمس کی تقریبات کا انعقاد کیا گیا۔
اس موقع پر، صدر مملکت آصف علی زرداری، وزیراعظم شہباز شریف اور مسلح افواج نے مسیحی برادری کو کرسمس کی مبارکباد دی۔ برطانوی ہائی کمشنر جین میریٹ نے بھی منفرد انداز میں کرسمس کی مبارکباد دی۔
