راولپنڈی : بشریٰ بی بی جو کہ سابق وزیراعظم عمران خان کی اہلیہ ہیں، توشہ خانہ ٹو کیس میں ضمانت ملنے کے بعد اڈیالہ جیل سے رہا کر دی گئی ہیں۔ اسلام آباد ہائیکورٹ نے ان کی ضمانت کی منظوری دی، جس کے بعد اسپیشل جج سینٹرل نے ضمانتی مچلکے جاری کیے۔
بشریٰ بی بی نے 9 ماہ جیل میں گزارے، جہاں انہیں پہلے توشہ خانہ کیس میں 14 سال کی سزا سنائی گئی تھی۔ اس سزا کے بعد انہوں نے خود جیل آ کر گرفتاری دی تھی۔ بعد میں انہیں بنی گالہ منتقل کیا گیا جسے سب جیل قرار دیا گیا تھا۔
بشریٰ بی بی کی رہائی میں کچھ تکنیکی مسائل کی وجہ سے تاخیر ہوئی، لیکن اب ان کی رہائی کے بعد یہ دیکھنا ہوگا کہ ایف آئی اے کی جانب سے دوبارہ گرفتاری کا معاملہ کیسے آگے بڑھتا ہے۔
واضح رہے کہ گزشتہ روز ان کی توشہ خانہ ٹو کیس میں درخواست ضمانت منظور کی گئی تھی جس کے بعد آج صبح عدالت نے بانی پی ٹی آ ئی کی اہلیہ کی رہائی کی روبکار جا ری کی تھی ۔
