لاہور: پنجاب میں ’’مریم کی دستک‘‘ سروسز میں توسیع کا فیصلہ کرتے ہوئے ، تمام اضلاع میں سروسز دسمبر تک مہیا کرنے کی ہدایت کی گئی ہے۔ وزیر اعلیٰ پنجاب مریم نواز شریف نے ہر ڈویژن میں ’’مریم کی دستک‘‘ کی سروسز شروع کرنے کا حکم دیتے ہوئے پراجیکٹ میں توسیع کی منظوری دے دی۔
لاہور میں سروسز 40 تک بڑھانے کا فیصلہ کیا گیا جس کے بعد اگست میں سروسز 65 تک پہنچ جائے گی۔ ہر ڈویژن میں 14 اگست سے ’’مریم کی دستک‘‘ سروسز شروع ہو جائے گی۔ پولیس، ریونیو، بلدیات، ایکسائز، ٹی ایم اے اور ڈویلمنٹ اتھارٹیز سمیت دیگر محکموں کی سروسز دستک کے ذریعے میسر ہوں گی۔
وزیر اعلیٰ مریم نواز شریف کی زیر صدارت اجلاس میں دستک پراجیکٹ میں توسیع کی منظوری کی گئی۔ چیئرمین پی آئی ٹی بی نے مریم کی دستک پراجیکٹ توسیع پر بریفننگ دی۔
اجلاس میں دستک موبائل ایپلی کیشن کے ذریعے شہریوں کو ملنے والی سروسز کا جائزہ لیا گیا۔ وزیر اعلیٰ مریم نواز شریف نے دستک ایپ پر سروسز کی مزید بہتری کی ہدایت کی۔بریفنگ میں بتایا گیا کہ ڈومیسائل، ای اسٹیمپنگ، برتھ، ڈیتھ اور میرج سرٹیفکیٹس سروسز دستک ایپ کے ذریعے حاصل کی جا سکتی ہیں۔ پراپرٹی ٹیکس، ٹوکن ٹیکس، موٹر وہیکل ٹرانسفر اور نئی گاڑی کی رجسٹریشن کی سہولت بھی دستک ایپ سے حاصل کی جا سکتی ہے۔