پیرس :فرانس کے جنوبی شہر مارسیلی میں واقع روسی قونصل خانے پر دھماکہ خیز مواد سے حملہ کیا گیا، تاہم کسی جانی نقصان کی اطلاع نہیں ملی۔
پولیس کے مطابق نامعلوم افراد نے قونصل خانے کے احاطے میں دھماکہ خیز مواد سے بھری تین بوتلیں پھینکیں، جن میں سے دو دھماکے سے پھٹ گئیں۔ یہ بوتلیں قونصل خانے کے باغیچے میں گریں، اور ماہرین ان کے مواد کا تجزیہ کر رہے ہیں۔
حملے کے بعد قونصل خانے کے عملے کو کچھ دیر تک عمارت میں ہی رہنے کی ہدایت دی گئی، جبکہ بم ڈسپوزل اسکواڈ نے علاقے کا معائنہ کیا۔
روسی حکومت نے اس حملے کو دہشت گردی قرار دیتے ہوئے فرانس سے وضاحت طلب کی ہے۔ روسی وزارت خارجہ کی ترجمان نے کہا ہے کہ "مارسیلی میں روسی قونصل خانے کے احاطے میں ہونے والے دھماکے میں دہشت گردی کے تمام آثار موجود ہیں۔"
روسی حکام نے فرانس سے اس واقعے کی مکمل تحقیقات اور سکیورٹی اقدامات کو یقینی بنانے کا مطالبہ کیا ہے۔
فرانسیسی حکام نے واقعے کی مذمت کرتے ہوئے تحقیقات کا آغاز کر دیا ہے، تاہم حملے کے پس پردہ مقاصد اور ملزمان کے بارے میں تاحال کوئی تفصیلات سامنے نہیں آئیں۔
فرانسیسی حکومت نے روسی قونصل خانے کی سکیورٹی مزید سخت کرنے کی یقین دہانی کرائی ہے۔
