کیلیفورنیا : انسٹا گرام نے اپنے صارفین کے لیے ڈائریکٹ میسجز (ڈی ایمز) میں متعدد نئے اور دلچسپ فیچرز متعارف کرادیے ہیں۔ کمپنی کی جانب سے حال ہی میں ان فیچرز کا اعلان کیا گیا اور بتایا گیا کہ اب یہ ڈی ایمز ایپل آئی میسج اور دیگر میسجنگ ایپس کا متبادل بن چکے ہیں۔
نئے فیچرز کے مطابق اب صارفین دنیا بھر میں 99 زبانوں کے پیغامات کا ترجمہ کر سکتے ہیں۔ یہ فیچر صارفین کو اپنے پیغامات کو مختلف زبانوں میں ترجمہ کرنے کی سہولت فراہم کرے گا۔ اس کے علاوہ آئی او ایس اور اینڈرائیڈ صارفین اب اپنے چیٹس میں میوزک شیئر کرسکیں گے۔ اس فیچر کو استعمال کرنے کے لیے چیٹ کمپوزر سکرین میں سٹیکر بٹن پر کلک کریں اور میوزک آپشن کا انتخاب کریں۔ وہاں آپ مختلف میوزک کلپس سرچ کر کے 30 سیکنڈ کے کلپ کو گروپ چیٹس یا براڈکاسٹ چینل پر شیئر کرسکیں گے۔
اسی طرح ایک نئے فیچر کے مطابق صارفین اب اپنے ڈی ایمز میں اہم میسجز کو پن کر سکتے ہیں، جو چیٹ ونڈو پر سب سے اوپر نظر آئیں گے۔ ہر چیٹ میں 3 میسجز کو پن کرنے کی اجازت ہوگی۔ انسٹا گرام نے میسجز شیڈول کرنے کا فیچر بھی متعارف کرایا ہے، جس کے ذریعے صارفین اپنے میسجز کو 29 دن تک شیڈول کرسکیں گے۔
دوسری جانب اس فیچر کے ذریعے صارفین اپنے دوستوں کو گروپ چیٹ میں شامل کرنے کے لیے ایک کیو آر کوڈ بھیج سکتے ہیں، جو کہ گروپ چیٹ میں شمولیت کا دعوت نامہ ہوگا۔ یہ نئے فیچرز انسٹا گرام کے صارفین کے لیے زیادہ انٹرایکٹو اور سہولت بخش تجربہ فراہم کرنے کے لیے متعارف کرائے گئے ہیں۔