لاہور : لاہور ہائیکورٹ نے پاکستان تحریک انصاف (پی ٹی آئی) کی 22 مارچ کو مینار پاکستان پر جلسے کی اجازت کی درخواست کو خارج کر دیا۔ عدالت نے درخواست پر سماعت جسٹس فاروق حیدر کی سربراہی میں کی۔
درخواست گزار، پی ٹی آئی رہنما اکمل باری نے عدالت میں مؤقف اپنایا کہ پی ٹی آئی 22 مارچ کو آئین اور قانون کے مطابق مینار پاکستان گراؤنڈ میں جلسہ کرنا چاہتی ہے اور اس سلسلے میں انتظامیہ کو درخواست دی گئی تھی، تاہم کوئی جواب نہیں آیا۔ درخواست میں استدعا کی گئی تھی کہ عدالت انتظامیہ کو جلسے کی اجازت دینے کا حکم دے۔
لاہور ہائیکورٹ کے رجسٹرار آفس کی جانب سے یہ اعتراض عائد کیا گیا تھا کہ درخواست متعلقہ کمیٹی کے سامنے دائر نہیں کی گئی، جس کی وجہ سے درخواست کو مسترد کر دیا گیا۔ عدالت نے رجسٹرار آفس کا اعتراض برقرار رکھتے ہوئے درخواست کو خارج کر دیا اور درخواست گزار کو ہدایت کی کہ وہ ریڈرسل کمیٹی سے رجوع کریں۔ عدالت نے یہ بھی کہا کہ اگر کمیٹی فیصلہ نہیں کرتی تو درخواست گزار عدالت سے دوبارہ رجوع کر سکتا ہے۔
