باکو : وزیراعظم شہباز شریف آذربائیجان کے صدر الہام علیوف سے ملاقات کے لیے صدارتی محل زوولبا پہنچ گئے۔ آذربائیجان کے صدر الہام علیوف نے وزیراعظم کا مرکزی دروازے پر استقبال کیا، جہاں دونوں رہنماؤں نے پرجوش مصافحہ کیا۔
وزیراعظم شہباز شریف کو گارڈ آف آنر بھی پیش کیا گیا اور اس دوران دونوں ممالک کے قومی ترانے بجائے گئے۔ وزیراعظم کا یہ دو روزہ دورہ آذربائیجان میں اہم ملاقاتوں پر مبنی ہے، جہاں وہ آذربائیجان کے اعلیٰ حکام سے بات چیت کریں گے۔ ان ملاقاتوں میں توانائی، تجارت، دفاع، تعلیم اور موسمیاتی تبدیلی کے شعبوں میں دوطرفہ تعاون کو مزید فروغ دینے پر زور دیا جائے گا۔دورے کے دوران دونوں ممالک کے درمیان متعدد مفاہمتی یادداشتوں اور معاہدوں پر دستخط کیے جائیں گے، اور وزیراعظم شہباز شریف بزنس فورم سے بھی خطاب کریں گے۔