اسلام آباد : عالمی مالیاتی فنڈ (آئی ایم ایف) کا 4 رکنی تکنیکی وفد کلائمیٹ فنانسنگ پر مذاکرات کے لیے پاکستان پہنچ گیا ہے۔ ذرائع کے مطابق وفاقی اور صوبائی حکام کے ساتھ مذاکرات کا شیڈول تیار کر لیا گیا ہے، جس میں گرین بجٹنگ، کلائمیٹ سپینڈنگ پر ٹیگنگ، ٹریکنگ اور رپورٹنگ کے معاملات پر بات چیت ہوگی۔
آئی ایم ایف وفد کے ساتھ ہونے والے آئندہ مذاکرات میں ایک اہم مسئلہ آئندہ مالی سال 2025-26 کے بجٹ میں کاربن لیوی عائد کرنے کی تجویز پر بات چیت ہو گی۔ آئی ایم ایف کی جانب سے اس تجویز کو زیر غور لایا جائے گا اور ابتدائی مسودے پر بات کی جائے گی۔
ذرائع کے مطابق، آج سے 28 فروری تک آئی ایم ایف کا تکنیکی وفد وفاقی اور صوبائی حکام کے ساتھ مذاکرات کرے گا، جس میں کاربن لیوی، الیکٹریکل وہیکل کی سبسڈی اور دیگر کلائمیٹ چینج اقدامات پر بات چیت کی جائے گی۔ اس دوران آئی ایم ایف وفد آئندہ بجٹ میں گرین بجٹنگ کو بڑھانے کے لیے اپنی تجاویز بھی دے گا۔ آج کے مذاکرات میں صرف کلائمیٹ چینج کے اقدامات پر بات کی جائے گی، اور وفاق اور صوبوں کو اپنے کلائمیٹ چینج اقدامات کے بارے میں بریفنگ دینے کا موقع دیا جائے گا۔
