اسلام آباد:وزیراعظم شہباز شریف نے کہا ہے کہ امریکہ کی جانب سے عائد کی جانے والی پابندیاں بلاجواز ہیں، اور پاکستان اپنے جوہری پروگرام پر کسی بھی قسم کا سمجھوتہ نہیں کرے گا۔ وفاقی کابینہ کے اجلاس میں خطاب کرتے ہوئے انہوں نے کہا کہ پاکستان کا دفاعی نظام صرف اپنے دفاع کے لیے ہے، نہ کہ جارحیت کے لیے۔ وزیراعظم نے اس بات پر زور دیا کہ نیشنل ڈیفنس کمپلیکس اور دیگر اداروں پر پابندیاں عائد کرنے کا کوئی جواز نہیں ہے، اور پاکستان اپنے دفاعی اقدامات جاری رکھے گا۔
وزیراعظم نے کہا کہ پاکستان کا جوہری پروگرام 24 کروڑ عوام کے لیے اہم ہے اور یہ ان کے دلوں سے زیادہ عزیز ہے۔ اس پروگرام پر کوئی سمجھوتہ نہیں ہوگا اور پوری قوم اس پر یکجہتی کے ساتھ متحد ہے۔ انہوں نے اس بات کا بھی ذکر کیا کہ دفتر خارجہ نے اس معاملے پر مؤثر اور واضح جواب دیا ہے۔
وزیراعظم نے ملک میں دہشت گردی کے بڑھتے ہوئے واقعات پر تشویش کا اظہار کرتے ہوئے کہا کہ دہشت گردی کے مکمل خاتمے تک چین سے نہیں بیٹھیں گے۔ ان کا کہنا تھا کہ دہشت گردی کا مکمل خاتمہ کیے بغیر معاشی ترقی ممکن نہیں اور پاک فوج کے جوان وطن کے دفاع میں اپنی جانیں دے رہے ہیں۔
شہباز شریف نے پاکستان تحریک انصاف (پی ٹی آئی) کے ساتھ مذاکرات کے حوالے سے بھی کہا کہ ان کی پہلی ملاقات ہو چکی ہے اور دونوں جماعتوں کی مذاکراتی کمیٹیاں پاکستان کے مفاد میں بہترین حل تلاش کرنے کے لیے کام کر رہی ہیں۔ انہوں نے کہا کہ مذاکرات کا مقصد قومی مفادات کو ذاتی مفادات سے بالاتر رکھنا ہے تاکہ ملک میں یکجہتی اور ترقی کو فروغ مل سکے۔
