لاہور : پاکستان کرکٹ بورڈ (پی سی بی) نے ویسٹ انڈیز کے دورہ پاکستان کی تفصیلات کا اعلان کر دیا ہے، جس کے مطابق ویسٹ انڈیز کی کرکٹ ٹیم 6 جنوری 2025 کو پاکستان پہنچے گی۔ ویسٹ انڈیز ٹیم اسلام آباد پہنچنے کے بعد 10 سے 12 جنوری تک راولپنڈی کرکٹ اسٹیڈیم میں پاکستان شاہینز کے خلاف تین روزہ میچ کھیلے گی۔
پاکستان کرکٹ بورڈ کے مطابق ویسٹ انڈیز ٹیم ملتان میں پاکستان کے خلاف دو ٹیسٹ میچز کھیلے گی۔ پہلا ٹیسٹ 17 سے 21 جنوری تک اور دوسرا ٹیسٹ 25 سے 29 جنوری تک کھیلا جائے گا۔ یہ ویسٹ انڈیز کا 19 سال میں پہلا ٹیسٹ دورہ پاکستان ہوگا۔ ویسٹ انڈیز نے آخری بار نومبر 2006 میں پاکستان میں تین ٹیسٹ میچز کھیلے تھے، جبکہ پاکستان کے خلاف آخری ٹیسٹ سیریز اکتوبر 2016 میں متحدہ عرب امارات میں ہوئی تھی۔
ویسٹ انڈیز نے 2018 کے بعد سے تین بار پاکستان کا دورہ کیا ہے، جس میں ایک بار ون ڈے انٹرنیشنل سیریز جون 2022 میں اور دو بار ٹی ٹوئنٹی انٹرنیشنل سیریز اپریل 2018 اور دسمبر 2021 میں کھیلی گئی تھیں۔