لاہور : محکمہ موسمیات نے ملک کے مختلف حصوں میں بارش اور پہاڑوں پر ہلکی برفباری کی پیشگوئی کی ہے۔ محکمہ موسمیات کے مطابق، ملک کے بیشتر علاقوں میں موسم سرد اور خشک رہے گا، جبکہ پہاڑی علاقوں میں صبح اور رات کے اوقات میں شدید سردی کا امکان ہے۔
گلگت بلتستان اور کشمیر میں صبح کے اوقات میں جزوی طور پر ابر آلود رہنے کے علاوہ بعض مقامات پر ہلکی بارش اور پہاڑوں پر ہلکی برفباری متوقع ہے۔ پنجاب، بالائی سندھ اور خیبر پختونخوا کے میدانی علاقوں میں صبح اور رات کے اوقات میں دھند چھانے کی توقع ہے۔
اسلام آباد اور گرد و نواح میں موسم سرد رہے گا اور صبح کے اوقات میں جزوی ابر آلود رہنے کا امکان ہے۔ پنجاب کے بیشتر اضلاع میں موسم سرد جبکہ مری، گلیات اور ان کے گرد و نواح میں موسم شدید سرد اور ابر آلود رہے گا، جہاں رات کے اوقات میں ہلکی بارش اور برفباری بھی ہو سکتی ہے۔
خیبرپختونخوا کے بیشتر اضلاع میں موسم سرد اور خشک رہے گا، جب کہ پہاڑی علاقوں میں شدید سردی اور ابر آلود موسم متوقع ہے۔ صبح کے اوقات میں صوابی، مردان، پشاور اور دیگر علاقوں میں دھند چھانے کی توقع ہے۔
بلوچستان کے بیشتر علاقوں میں موسم سرد اور خشک جبکہ پہاڑی علاقوں میں شدید سردی کا امکان ہے۔ سندھ کے بیشتر حصوں میں موسم سرد اور خشک رہے گا، تاہم سکھر، شکارپور اور دیگر کچھ علاقوں میں صبح کے اوقات میں دھند چھانے کی توقع ہے۔ کشمیر اور گلگت بلتستان میں موسم شدید سرد اور ابر آلود رہنے کے ساتھ ہلکی بارش اور ہلکی برفباری بھی ہو سکتی ہے۔