اسلام آباد: نئی نہروں کے منصوبے پر پیدا ہونے والے تنازعے کے تناظر میں وزیراعظم شہباز شریف اور چیئرمین پیپلز پارٹی بلاول بھٹو زرداری کی آج شام اہم ملاقات متوقع ہے۔ ذرائع کے مطابق ملاقات وزیراعظم ہاؤس میں ہو گی جس میں وزیراعلیٰ سندھ مراد علی شاہ بھی شریک ہوں گے۔
ذرائع کا کہنا ہے کہ ملاقات کے دوران سندھ حکومت نئی نہروں کے منصوبے پر اپنا مؤقف وزیراعظم کے سامنے رکھے گی۔ امکان ظاہر کیا جا رہا ہے کہ اس اہم ملاقات میں نہروں کے حوالے سے کوئی بڑی پیش رفت سامنے آ سکتی ہے۔
یاد رہے کہ دو روز قبل وزیراعلیٰ سندھ مراد علی شاہ نے نئی نہر کے منصوبے پر شدید تحفظات کا اظہار کرتے ہوئے کہا تھا کہ چاہے یہ منصوبہ کسی نے بھی بنایا ہو، سندھ حکومت اسے منظور نہیں کرے گی۔ انہوں نے واضح کیا کہ وزیراعظم کو بھی اس کے ممکنہ نتائج کا ادراک ہے، اور سندھ حکومت اس بات پر ناخوش ہے کہ یہ منصوبہ تاحال ختم کیوں نہیں کیا گیا۔
دوسری جانب وزیراعظم کے مشیر رانا ثنا اللہ کا کہنا تھا کہ جب نہروں کی منظوری ہی نہیں دی گئی، تو اعتراضات کی کوئی بنیاد نہیں بنتی۔ ان کا یہ بھی کہنا تھا کہ سندھ میں کچھ عناصر جان بوجھ کر ماحول خراب کرنے کی کوشش کر رہے ہیں۔