ملتان: ایچ بی ایل پاکستان سپر لیگ (پی ایس ایل) 10 کے تیرہویں میچ میں اسلام آباد یونائیٹڈ نے شاندار کارکردگی کا مظاہرہ کرتے ہوئے ملتان سلطانز کو 7 وکٹوں سے شکست دے دی۔
میچ کا آغاز ملتان کرکٹ اسٹیڈیم میں ہوا جہاں ملتان سلطانز کے کپتان محمد رضوان نے ٹاس جیت کر پہلے بیٹنگ کا فیصلہ کیا۔ ملتان سلطانز نے مقررہ 20 اوورز میں 5 وکٹوں کے نقصان پر 168 رنز بنائے، جبکہ عثمان خان نے 61 رنز کی شاندار اننگز کھیلی، محمد رضوان نے 36 اور یاسر خان نے 29 رنز کے ساتھ ٹیم کو ایک مناسب آغاز فراہم کیا۔
اسلام آباد یونائیٹڈ کی جانب سے جیسن ہولڈر، محمد نواز اور کپتان شاداب خان نے ایک ایک وکٹ حاصل کی۔
جواب میں اسلام آباد یونائیٹڈ نے ہدف کا تعاقب پراعتماد انداز میں کیا۔ اوپنرز نے عمدہ آغاز فراہم کیا، جس کے بعد آیندریس گوس نے دھواں دھار بیٹنگ کا مظاہرہ کرتے ہوئے 45 گیندوں پر 80 رنز کی ناقابل شکست اننگز کھیلی اور ٹیم کو فتح دلانے میں مرکزی کردار ادا کیا۔ ان کے علاوہ کولن منرو نے 45، صاحبزادہ فرحان نے 22 تاہم محمد نواز نے 21 رنز بنائے۔
اسلام آباد یونائیٹڈ نے 169 رنز کا ہدف 18ویں اوور میں صرف 3 وکٹوں کے نقصان پر حاصل کر لیا۔ اس جیت کے بعد پوائنٹس ٹیبل پر اسلام آباد یونائیٹڈ کی پوزیشن مزید مستحکم ہو گئی ہے، جبکہ ملتان سلطانز کو اپنی حکمت عملی پر نظرِ ثانی کرنے کی ضرورت ہے۔