اسلام آباد: پاکستان بھر کے11اضلاع کے ماحولیاتی نمونوں میں پولیو وائرس کی تصدیق ہوئی اور اب تک 54 ماحولیاتی نمونوں میں پولیو وائرس کی تصدیق ہوچکی ہے۔
وفاقی وزیر ڈاکٹر ندیم جان کے مطابق بلوچستان، خیبر پختونخوا، پنجاب اور سندھ کے گیارہ اضلاع کے ماحولیاتی نمونوں میں پولیو کی تصدیق ہوئی ہے، اور ملک بھر سے اب تک 54 ماحولیاتی نمونوں میں پولیو وائرس کی تصدیق ہوچکی ہے۔
وزارت صحت نے بتایا کہ پنجاب میں لاہور کے علاقے گلشن راوی کے ماحولیاتی نمونے میں بھی پولیو وائرس پایا گیا۔ بلوچستان میں چمن، پشین اورکوئٹہ، خیبر پختونخواہ میں بنوں کے ایک اور پشاورکے چارعلاقوں کے ماحولیاتی نمونوں میں پولیو وائرس پایا گیا جبکہ سندھ میں کراچی کے علاقے کیماڑی اور ڈسٹرکٹ سینٹرل سے ماحولیاتی پولیو وائرس کے نمونے ملے ہیں۔ گزشتہ روز کراچی میں پولیو کا چوتھا کیس سامنے آیا تھا۔
اسلام آباد میں منعقدہ پولیو واک سے خطاب کرتے ہوئے نگران وفاقی وزیر صحت ندیم جان نے پاکستان میں پولیو کیسز بڑھنے کا اعتراف کرتے ہوئے کہا کہ ملک سے پولیو کا خاتمہ چاہتے ہیں کوشش ہے تمام بچے اس مہلک مرض سے بچ سکیں۔
ڈاکٹر ندیم جان کا کہنا تھا کہ پاکستان اورافغانستان میں پولیو کیسززیادہ ہو رہے ہیں، ملک بھر سے پولیو کا خاتمہ ہر کسی کا مشن ہے، انسداد پولیو ویکسین سے پولیو کے پھیلاؤ میں کمی آئی۔
نگراں وزیرصحت نے کہا کہ پولیو وائرس بچوں کیلئےانتہائی خطرناک ہے، انسداد پولیو کیلئے ویکسینیشن کے عمل کو مزید تیز کیا جائے گا، پولیو ورکرز کی مرض کے خاتمے کیلئے کاوشیں لائق تحسین ہیں، ان کی توقیر ہم سب پرلازم ہے، یہ قوم کے ہیروز ہیں۔
“Children are our future, and the @GovtOfPakistan will leave no stone unturned to ensure that the disability-causing poliovirus does not remain a threat to their wellbeing.” – Dr. Nadeem Jan, Federal Health Minister#WorldPolioDay #WalkToEndPolio pic.twitter.com/0kOt8wZkOJ
— Ministry of National Health Services, Pakistan (@nhsrcofficial) October 22, 2023
دوسری جانب ورلڈ ہیلتھ آرگنائزیشن کے پاکستان میں سربراہ ڈاکٹرماہی پالہ نے میڈیا سے بات کرتے ہوئے کہا کہ پولیو کے خاتمے کے لیے حکومت پاکستان کے ساتھ کھڑے ہیں۔
ڈاکٹر ماہی پالہ کا کہنا تھا کہ پاکستان کی کاوشوں کو دیکھ کر لگتا ہے آئندہ سالوں میں پاکستان فری پولیو ملک بنے گا، اس حوالے سے شہریوں کی خدمات بھی قابل ستائش ہیں، ہم پاکستان سے پولیو کے خاتمے کے لیے وزارت صحت کے ساتھ مل کر کام کر رہے ہیں۔
