لاہور: امیر جماعت اسلامی حافظ نعیم الرحمان کاکہنا ہے کہ ملک میں جاری سیاسی بحران کاحل نئے الیکشن نہیں بلکہ فارم 45 کے مطابق فیصلہ ہونا چاہیے۔
لاہور میں جماعت اسلامی کے مرکز منصورہ میں پریس کانفرنس سے خطاب میں امیر جماعت اسلامی حافظ نعیم الرحمان کا کہنا تھا کہ ملک میں جاری سیاسی بحران کاحل نئے الیکشن نہیں بلکہ فارم 45 کے مطابق فیصلہ ہونا چاہیے۔ان کاکہنا تھا کہ آصف زرداری کہتے تھے ان کے دور میں کوئی سیاسی قیدی جیل میں نہیں رہے گا اب بھی وہ قدم بڑھائیں اور جو سیاسی قیدی جیل میں ہے اسے رہا کروائیں۔
امیر جماعت اسلامی کا مزید کہنا تھا کہ ہتک عزت بل لاکر میڈیا پر پابندیاں لگانے کی سازش کی گئی ہے جسے ناکام بنائیں گے۔ ملک میں نئے انتخابات کی ضرورت نہیں فارم 45 کا فیصلہ ہوجائے تو دودھ کا دودھ پانی کا پانی ہوجائے گا۔ جو نئے الیکشن کی باتیں کررہے ہیں وہ سسٹم کو کنفیوژ کرنا چاہتے ہیں۔
حافظ نعیم الرحمان نے کہاکہ حکومت آئندہ بجٹ میں سارا بوجھ عوام پر ڈالنا چاہتی ہے ۔ پاکستان کو آئی ایم ایف کی طرف سے ماضی میں دیئے گئے 23 بیل آؤٹ پیکج ہماری معیشت کو تباہ وبرباد کرچکے ہیں۔ آئی ایم ایف کو امریکا چلاتا ہے اور ان کی نظریں پاکستان کے ایٹمی پروگرام پر ہیں۔
انہوں نے مزید کہاکہ لوگوں نے حالات سے مایوس ہو کر سولر پینل لینا شروع کئے۔ نیٹ میٹرنگ بھی ختم کر دی جائے گی اب لوگوں کی سرمایہ کاری پر بھی تلوار لٹک رہی ہے۔
