راولپنڈی: سیکیورٹی فورسز نے پاک افغان سرحد پر دراندازی کی کوشش ناکام بناتے ہوئے 16 دہشت گردوں کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کے مطابق 22 اور 23 مارچ کی درمیانی شب دہشت گردوں نے شمالی وزیرستان کے علاقے غلام خان کلی سے سرحد پار کرنے کی کوشش کی، جسے سیکیورٹی فورسز نے بروقت کارروائی کرتے ہوئے ناکام بنا دیا۔ شدید فائرنگ کے تبادلے میں تمام 16 دہشت گرد مارے گئے۔
آئی ایس پی آر نے ایک بار پھر افغان عبوری حکومت سے مطالبہ کیا کہ وہ اپنی سرزمین کو پاکستان کے خلاف دہشت گردی کے لیے استعمال ہونے سے روکے۔
ترجمان نے واضح کیا کہ پاکستان بار بار مؤثر بارڈر مینجمنٹ پر زور دیتا رہا ہے اور توقع ہے کہ افغان حکومت اپنی ذمہ داری پوری کرے گی۔
آئی ایس پی آر کے مطابق پاکستانی سیکیورٹی فورسز اپنی سرحدوں کے تحفظ کے لیے پرعزم ہیں اور دہشت گردوں کے خاتمے کے لیے ہر ممکن اقدامات کیے جائیں گے۔