ملک بھر میں ’’یوم پاکستان‘‘ ملی جوش و جذبے کے ساتھ منایا جا رہا ہے

اسلام آباد : ملک بھر میں ’’یوم پاکستان‘‘ ملی جوش و جذبے کے ساتھ منایا جا رہا ہے۔ دن کا آغاز وفاقی دارالحکومت اسلام آباد میں 31 توپوں کی سلامی سے ہوا، جبکہ صوبائی دارالحکومتوں میں 21 توپوں کی سلامی دی گئی۔ فضا پاک فوج کے جوانوں کے ’’اللہ اکبر‘‘ اور ’’پاکستان زندہ باد‘‘ کے نعروں سے گونج اٹھی، اور مساجد میں وطن عزیز کی سالمیت، ترقی اور خوشحالی کے لیے دعائیں کی گئیں۔

یوم پاکستان کے موقع پر لاہور میں شاعر مشرق، علامہ اقبال کے مزار پر گارڈز کی تبدیلی کی پروقار تقریب کا انعقاد کیا گیا۔ پاک فضائیہ کے دستے نے مزار اقبال پر گارڈز کے فرائض سنبھال لیے۔ اس تقریب میں سول اور عسکری حکام نے بھی شرکت کی، جبکہ ایئر وائس مارشل اختر عمران سدوزئی مہمان خصوصی تھے۔

ایئر وائس مارشل اختر عمران سدوزئی نے پریڈ کا معائنہ کیا، اور ایئر فورس اور رینجرز کے چاک و چوبند دستوں نے انہیں سلامی دی۔ مہمان خصوصی نے مزار اقبال پر پھول چڑھائے، فاتحہ خوانی کی اور مزار اقبال پر مہمانوں کی کتاب میں اپنے تاثرات بھی قلمبند کیے۔