کیلیفورنیا : مقبول انسٹنٹ میسیجنگ ایپلی کیشن واٹس ایپ اپنے صارفین کے لیے ایک نیا اور دلچسپ فیچر متعارف کرانے جا رہی ہے۔ اطلاعات کے مطابق، جلد ہی صارفین واٹس ایپ سٹیٹس یا اسٹوری میں ڈیڑھ منٹ یعنی 90 سیکنڈ طویل ویڈیوز شیئر کر سکیں گے۔
فی الحال واٹس ایپ پر ایک منٹ (60 سیکنڈ) تک کی ویڈیو سٹیٹس میں اپ لوڈ کی جا سکتی ہے۔ خیال رہے کہ پہلے صرف 30 سیکنڈ تک کی ویڈیوز شیئر کی جاتی تھیں تاہم بعد میں اس دورانیے کو بڑھا کر ایک منٹ کردیا گیا تھا ۔
واٹس ایپ کی اپڈیٹس پر نظر رکھنے والی ایک ویب سائٹ کا کہنا ہے کہ یہ نیا فیچر فی الحال آزمائشی مرحلے میں ہے، اور اس تک مخصوص صارفین کو ہی رسائی دی گئی ہے۔ البتہ اس کی ٹیسٹنگ مکمل ہونے کے بعد یہ امکان ہے کہ آنے والے چند مہینوں میں یہ فیچر تمام صارفین کے لیے دستیاب ہوگا ۔
اس نئے فیچر کی بدولت صارفین کو اپنے خیالات اور لمحات کو زیادہ تفصیل سے شیئر کرنے کا موقع ملے گا، جو کہ صارفین کے لیے بلاشبہ ایک خوش آئند اضافہ ہے۔