پشاور: خیبرپختونخوا کابینہ کے 31ویں اجلاس کے لیے 13 نکاتی ایجنڈا جاری کیا گیا ہے جو 24 اپریل کو وزیر اعلیٰ علی امین گنڈا پور کی زیر صدارت منعقد ہوگا۔
سرکاری اعلامیے کے مطابق اجلاس میں خیبرپختونخوا چیریٹی ایکٹ 2019 میں ترمیم کے مسودے کی منظوری دی جائے گی، جبکہ مغربی پاکستان لینڈ ریونیو رولز 1967 کے تحت نئے قواعد کی تیاری بھی زیر غور آئے گی۔
اس کے علاوہ اجلاس میں صوبائی محتسب کی سفارشات کے خلاف دی گئی نمائندگی پر بھی غور کیا جائے گا، اور انفارمیشن ٹیکنالوجی بورڈ کے نئے ممبران کی منظوری دی جائے گی۔ محکمہ صنعت کے ڈھائی کروڑ روپے کے باقی ماندہ فنڈز کی منظوری، اور زرعی تحقیقاتی اصلاحات بل 2025 کا جائزہ بھی ایجنڈے میں شامل ہے۔
میڈیکل ٹیچنگ انسٹی ٹیوشن اپیلٹ ٹریبونل رولز 2020 میں مجوزہ ترامیم، بی آر ٹی منصوبے کے لیے اضافی فنڈز کی فراہمی، اور ڈبلیو ایس ایس سی ہری پور کے بورڈ آف ڈائریکٹرز کے اراکین کی منظوری بھی اجلاس کے ایجنڈے کا حصہ ہیں۔
اس کے علاوہ انسداد دہشت گردی کی عدالتوں (بنوں اور ڈگر) کے لیے دو نئی گاڑیوں کی خریداری کی منظوری اور سوشل ویلفیئر، خصوصی تعلیم، اور خواتین کی فلاح و بہبود سے متعلقہ قواعد میں ترامیم پر بھی بات چیت کی جائے گی۔