ملتان: ایچ بی ایل پاکستان سپر لیگ (پی ایس ایل) 10 کے بارہویں میچ میں ملتان سلطانز نے لاہور قلندرز کو 33 رنز سے ہرا کر ایونٹ میں اپنی پہلی کامیابی حاصل کر لی۔
ملتان کرکٹ اسٹیڈیم میں کھیلے گئے میچ میں ملتان سلطانز کے کپتان محمد رضوان نے ٹاس جیت کر پہلے بیٹنگ کا فیصلہ کیا۔ سلطانز نے مقررہ 20 اوورز میں 5 وکٹوں کے نقصان پر 228 رنز بنائے۔ یاسر خان نے جارحانہ بلے بازی کا مظاہرہ کرتے ہوئے 44 گیندوں پر 87 رنز بنائے، جس میں 6 چھکے اور 6 چوکے شامل تھے۔ افتخار احمد نے 18 گیندوں پر 40 رنز کی ناقابلِ شکست اننگز کھیلی، جبکہ عثمان خان نے 39 اور کپتان محمد رضوان نے 32 رنز کا اضافہ کیا۔
لاہور قلندرز کی جانب سے رشاد حسین نے 2 وکٹیں حاصل کیں جبکہ شاہین آفریدی، آصف آفریدی اور سکندر رضا نے ایک، ایک کھلاڑی کو آؤٹ کیا۔جواب میں لاہور قلندرز کی ٹیم 229 رنز کے تعاقب میں 20 اوورز میں 195 رنز ہی بنا سکی۔ سکندر رضا نے 50، سیم بلنگز نے 43 اور فخر زمان نے 32 رنز کی اننگز کھیلی۔ ملتان سلطانز کے عبید شاہ نے شاندار بولنگ کرتے ہوئے 3 وکٹیں حاصل کیں، جبکہ اسامہ میر اور بریس ویل نے 2، 2 کھلاڑیوں کو آؤٹ کیا۔
ملتان سلطانز نے پی ایس ایل 10 میں چار میچز کھیلنے کے بعد پہلی فتح حاصل کی ہے، جبکہ لاہور قلندرز کے چار میچز کے بعد 4 پوائنٹس ہو چکے ہیں۔
