لاہور:سابق وفاقی وزیر اطلاعات اور پاکستان پیپلزپارٹی پنجاب کے صدر قمر زمان کائرہ نے کہا ہے کہ سندھ حکومت کو گرانے کے لیے وفاق کو صرف ماورا ئے آئین اقدام ہی اٹھانا پڑے گا۔ اگر سندھ میں گورنر راج لگا تو اس میں بھی انھیں شکست ہوگی۔
تفصیلات کے مطابق پیپلزپارٹی پنجاب کے صدر نے کہا کہ سید مراد علی شاہ اگر گرفتار بھی ہوئے تو وہ ہی صوبے کے وزیر اعلیٰ رہیں گے۔انہوں نے کہا کہ پاکستان تحریک انصاف والے اتنے کمزور ہیں کہ نیوروبیان کے ٹیکے لگائے بغیر چل ہی نہیں سکتے۔
عمران خان کی حکومت چند ووٹوں پر کھڑی ہے اسے گرانا کوئی مسئلہ ہی نہیں۔انہوں نے کہا کہ پی پی رہنماؤں کی گرفتاریوں کے پیچھے کشمیر،افغا نستان، مہنگائی جیسے ایشوز کو دبایا جارہا ہے۔
اپوزیشن اتحاد اور اسلام آباد دھرنے کے حوالے سے قمرزمان کائرہ کا کہنا تھا کہ پیپلزپارٹی نے مولانا فضل الرحمان کو اپنے تحفظات سے آگاہ کر دیا ہے۔ تحفظات اگر دور نہ ہوئے تو مولانا کے ساتھ ہماری صرف دعائیں ہی رہ جائیں گی۔
