واشنگٹن: متحدہ عرب امارات نے امریکا میں 1400 ارب ڈالر کی سرمایہ کاری کرنے کا اعلان کیا ہے، جو اگلے 10 سالوں پر مشتمل فریم ورک کے تحت کی جائے گی۔
وائٹ ہاؤس کے مطابق یہ سرمایہ کاری امریکا میں ایلومینیم پلانٹ سمیت مختلف منصوبوں میں استعمال کی جائے گی۔ اس کا اعلان اوول آفس میں امریکی صدر سے اماراتی حکام کی ملاقات کے بعد کیا گیا۔
یہ معاہدہ اس ملاقات کے بعد طے پایا جس میں امارات کے قومی سلامتی کے مشیر شیخ طحنون بن زاید نے منگل کے روز صدر ٹرمپ سے بات چیت کی۔
علاوہ ازیں، امریکی نائب صدر جے ڈی وینس اور متعدد کابینہ اراکین نے اماراتی وفد کے ساتھ عشائیہ کیا، جس میں یو اے ای کے بڑے خودمختار سرمایہ کاری فنڈز اور کارپوریشنز کے سربراہان بھی شریک تھے۔
