کویت سٹی : کویتی حکومت نے عید الاضحیٰ کے موقع پر موسمی قصائیوں کے خلاف ایکشن لے لیا ،مقامی بلدیہ نے احکامات جاری کیے ہیں کہ موسمی قصائیوں پر 700 دینار کا جرمانہ عائد یا انہیں ملک بدر کیا جائے گا، ایسے قصائی چلتی پھرتی بیماری ہیں۔
کویتی میڈیا کے مطابق جہرا گورنریٹ میں کویت میونسپلٹی برانچ میں صفائی اور روڈ ورکس ڈپارٹمنٹ کے ڈائریکٹر فہد القریفہ نے عید الاضحٰی کے دوران موسمی قصابوں کو غیر قانونی خدمات فراہم کرنے سے روکنے کی ہدایات جاری کی ہیں جبکہ ان کو روکنے کے لیے ٹیمیں بھی تشکیل دی گئی ہیں۔
ڈائریکٹر فہد القریفہ نے تصدیق کی کہ عید الاضحٰی کے دنوں میں گورنریٹس کے ذبح خانوں میں ہجوم کا فائدہ اٹھا کر غیرقانونی سروس پیش کرنے والے غیر قانونی قصائیوں پر بلدیہ کڑی نظر رکھے ہوئے ہے۔
انہوں نے نشاندہی کی کہ عید الاضحٰی کے دوران نظر آنے والے موسمی قصائی گلیوں میں فروخت کنندگان کے زمرے میں آتے ہیں جن پر قانون کی خلاف ورزی کے نتیجے میں 700 دینار یا انتظامی جلا وطنی جیسے جرمانے عائد کیے جائیں گے۔
ڈائریکٹر کا کہنا تھا کہ ان موسمی قصائیوں کو روکنا اس لیے ضروری ہے کہ ان کے گندے اوزاروں کے استعمال سے پیدا ہونے والی بیماریوں کے پھیلاؤ کو روکا جاسکے۔ لوگ اس عمل اور اس کے ساتھ ساتھ وائرس کے پھیلاؤ کے خطرے کو روکنے میں دفاع کی پہلی لائن ہیں۔
انہوں نے زور دے کر کہا کہ ایسے قصائیوں کے ذریعہ کرونا وائرس کے پھیلاؤ نے خطرے کو مزید بڑھا دیا ہے خاص طور پر اگر وہ کرونا سے متاثر ہیں۔ القریفہ نے نشاندہی کی کہ نجی مکانات اور گھروں کے اندر قصائیوں کی نگرانی کے لیے بلدیہ کے پاس کوئی طریقہ کار موجود نہیں ہے۔
