دبئی : انٹرنیشنل کرکٹ کونسل نے نئی ٹیسٹ پلیئرز رینکنگ جاری کر دی ہے جس میں پاکستانی کرکٹرز نے شاندار پرفارمنس دکھائی ہے۔ اسپنر ساجد خان نے 18 درجے کی زبردست چھلانگ لگائی اور 23 ویں پوزیشن پر پہنچ گئے، جب کہ نعمان علی نے 2 درجے ترقی حاصل کرتے ہوئے ٹاپ ٹین میں جگہ بنا لی اور 9 ویں نمبر پر آ گئے ہیں۔
پاکستان کے بیٹر سعود شکیل نے بھی 3 درجے ترقی پائی اور 8 ویں پوزیشن پر آ گئے ہیں۔ تاہم، قومی ٹیم کے کپتان بابر اعظم کی رینکنگ میں 4 درجے کی تنزلی ہوئی ہے، اور وہ 16 ویں پوزیشن پر پہنچ گئے ہیں۔ محمد رضوان نے 2 درجے ترقی حاصل کی اور 17 ویں پوزیشن پر آ گئے ہیں۔
اسپنرز کی شاندار کارکردگی کا اثر ساجد خان اور نعمان علی کی رینکنگ پر پڑا، کیونکہ ویسٹ انڈیز کے خلاف کھیلے گئے حالیہ ٹیسٹ میچ میں تمام بیس وکٹیں اسپنرز نے حاصل کی تھیں۔ بالرز کی رینکنگ میں بھارت کے جسپریت بمرا پہلے نمبر پر موجود ہیں، جبکہ آسٹریلیا کے پیٹ کمنز دوسرے نمبر پر ہیں۔تاہم ٹیسٹ بیٹرز کی رینکنگ میں انگلینڈ کے جو روٹ کا پہلا نمبر برقرار ہے۔
