لاہور: محکمہ موسمیات نے پنجاب کے مختلف اضلاع میں 25 فروری سے یکم مارچ کے دوران بارش اور پہاڑوں پر ہلکی برفباری کی پیشگوئی کی ہے۔
ترجمان پی ڈی ایم اے کے مطابق اس دوران پنجاب کے بیشتر علاقوں میں تیز ہوائیں چلنے اور بارش کا امکان ہے، جبکہ مری اور گلیات سمیت دیگر پہاڑی علاقوں میں برفباری بھی متوقع ہے۔
25 تا 28 فروری لاہور، جھنگ، فیصل آباد، شیخوپورہ، میانوالی اور سیالکوٹ میں بارش ہوگی۔
سرگودھا، بھکر، خوشاب، گوجرانوالہ اور گجرات میں بھی بارش کی پیشگوئی کی گئی ہے۔
25 سے 27 فروری کے دوران ملتان، لیہ، مظفرگڑھ، خانیوال، ساہیوال، پاکپتن، اوکاڑہ اور بہاولنگر میں بھی بارش کا امکان ہے۔
ترجمان پی ڈی ایم اے نے شہریوں کو محتاط رہنے کی ہدایت دیتے ہوئے کہا ہے کہ بارش کے باعث بعض علاقوں میں نشیبی مقامات پر پانی جمع ہونے کا خدشہ ہے، جبکہ برفباری سے سردی کی شدت میں مزید اضافہ متوقع ہے۔
