لاہور: انسداد دہشتگردی کی عدالت نے وزیراعلیٰ خیبرپختونخوا علی امین گنڈاپور کے ناقابل ضمانت وارنٹ گرفتاری جاری کر دیے ہیں۔ یہ اقدام 5 اکتوبر کو لاہور میں پاکستان تحریک انصاف (پی ٹی آئی) کے احتجاج اور پولیس پر تشدد کے واقعے کے کیس میں کیا گیا ہے۔
کیس کی سماعت کے دوران تفتیشی افسر نے عدالت کو بتایا کہ ملزمان کو کئی بار شاملِ تفتیش ہونے کے لیے بلایا گیا، لیکن علی امین گنڈاپور اور دیگر ملزمان پیش نہیں ہو رہے۔ پولیس کے مطابق یہ تمام افراد احتجاج اور تشدد کے مقدمات میں مطلوب ہیں۔
عدالت نے عدم تعاون پر صرف علی امین گنڈاپور ہی نہیں بلکہ حماد اظہر، سعید سندھو اور شہباز احمد کے بھی ناقابل ضمانت وارنٹ جاری کرتے ہوئے حکم دیا کہ تمام افراد کو جلد عدالت میں پیش کیا جائے۔
