لاہور : پاکستان سمیت دنیا کے مختلف ممالک میں آج زمین سے محبت اور اس کی حفاظت کا عالمی دن یومِ ارض منایا جا رہا ہے۔ اس دن کو منانے کا مقصد لوگوں میں زمین کو درپیش خطرات، جیسے ماحولیاتی آلودگی، گلوبل وارمنگ اور قدرتی آفات کے بارے میں شعور پیدا کرنا ہے۔
یومِ ارض سب سے پہلے 1970 میں منایا گیا تھا، اور آج یہ دن دنیا کے 190 سے زائد ممالک میں منایا جاتا ہے۔ اس دن کی اہمیت دن بدن بڑھتی جا رہی ہے کیونکہ زمین کو انسان کی غیر محتاط سرگرمیوں نے شدید نقصان پہنچایا ہے۔جنگلات کی کٹائی، فضائی آلودگی، پلاسٹک کا بے دریغ استعمال اور قدرتی وسائل کا ضیاع یہ سب وہ عوامل ہیں جن کے باعث ہم زلزلے، سیلاب، خشک سالی اور دیگر خطرناک آفات کا سامنا کر رہے ہیں۔
یومِ ارض ہمیں یاد دلاتا ہے کہ زمین صرف رہنے کی جگہ نہیں بلکہ ایک ذمہ داری ہے۔ اگر ہم چاہتے ہیں کہ آنے والی نسلوں کو بھی ایک محفوظ ماحول ملے تو ہمیں ابھی سے قدم اٹھانا ہوگا۔ درخت لگانا، ماحول کو صاف رکھنا، پلاسٹک کا کم سے کم استعمال اور پانی و بجلی جیسے وسائل کی بچت ، یہ سب وہ چھوٹے چھوٹے اقدامات ہیں جو بڑے فرق لا سکتے ہیں۔
سب سے ضروری بات یہ ہے کہ یومِ ارض کو صرف ایک دن کا جشن نہ بنایا جائے، بلکہ اس دن کے پیغام کو اپنی روزمرہ زندگی کا حصہ بنایا جائے۔
