اسلام آباد:وزیراعظم عمران خان نے کہا ہے کہ کراچی میں شوکت خانم پاکستان کا کینسر کا سب سے بڑا ہسپتال ہو گا۔
تفصیلات کے مطابق سماجی رابطے کی ویب سائٹ ٹوئٹر پر پیغام جاری کرتے ہوئے وزیراعظم عمران خان نے کہا کہ کراچی میں شوکت خانم کینسر ہسپتال کی تعمیر کا آغاز دیکھ کر اچھا لگا اوران شاءاللہ ہسپتال جدید ترین مشینوں سے لیس ہو گا۔
کراچی میں شوکت خانم میموریل ٹرسٹ کی تعمیر کا آغاز دیکھ کر دل اس احساسِ عظیم سے سرشار ہے کہ یہ کینسر ہسپتال پاکستان کا سب سے بڑا مرکزِ شفا بھی ہوگا اور (طب و علاج کے) جدید ترین سازوسامان سے آراستہ بھی۔pic.twitter.com/e5TY3eF8aa
— Imran Khan (@ImranKhanPTI) November 21, 2020
وزیراعظم نے اپنے آفیشل ٹوئٹر اکاﺅنٹ پرکراچی میں شوکت خانم ہسپتال کی تعمیر کیلئے جاری کام کی تصاویر کو بھی شیئر کیا ۔
واضح رہے کہ یہ منصوبہ تیرہ ارب روپے کی لاگت سے 3 سال سے بھی کم عرصے میں مکمل ہونے کی توقع کی جارہی ہے جبکہ ایک پریس کانفرنس میں ڈاکٹر عاصم یوسف نے کہا کہ شوکت خانم کینسر ہسپتال اور ریسرچ سنٹر کراچی کی تعمیر سے کینسر کے علاج کے لئے ملک کی مجموعی صلاحت میں خاطر خواہ اضافہ ہوگا اور ہر سال مریضوں کی مسلسل بڑھتی ہوئی تعداد کے پیش نظر علاج کی سہولتیں فراہم کرنے میں بھی آسانی ہوگی۔
یاد رہے کہ وزیراعظم عمران خان نے 29 دسمبر 2016 کو کراچی میں شوکت خانم کینسر ہسپتال کا سنگ بنیاد رکھا تھا .
