کراچی: جوڈیشل مجسٹریٹ جنوبی کی عدالت نے غیر قانونی اسلحے اور منشیات برآمدگی کیس میں مصطفیٰ عامر قتل کیس کے مرکزی ملزم ارمغان قریشی کے والد، ملزم کامران اصغر قریشی کو 2 روزہ جسمانی ریمانڈ پر حوالہ پولیس کر دیا۔
پولیس نے ملزم کامران قریشی کو عدالت میں پیش کیا۔ سماعت کے دوران، عدالت نے ملزم سے سوال کیا کہ کیا پولیس نے آپ پر تشدد کیا ہے؟ ملزم نے جواب دیا کہ اس کے جسم کے نازک حصوں پر تشدد کیا گیا ہے۔ عدالت نے فوراً عملے کو ہدایت کی کہ ملزم کا طبی معائنہ کیا جائے۔
ڈپٹی پبلک پراسیکیوٹر شکیل عباسی نے موقف اختیار کیا کہ ملزم سے اسلحے اور منشیات کی سپلائی سے متعلق معلومات حاصل کرنی ہیں، لہٰذا اس کا 3 روزہ جسمانی ریمانڈ دیا جائے۔ وکیل صفائی نے کہا کہ ملزم کو 18 مارچ کو گرفتار کیا گیا تھا، اور وہ اپنے بیٹے کا دفاع کر رہا ہے۔
عدالت نے ملزم کو 2 روزہ جسمانی ریمانڈ پر پولیس کے حوالے کرتے ہوئے اس کے طبی معائنے کی بھی ہدایت دی۔ مزید برآں، ملزم کامران قریشی نے اپنے رویے پر معذرت کرتے ہوئے کہا کہ اگر اس کے بیٹے ارمغان نے کسی کو قتل کیا ہے تو اسے سزا ملنی چاہیے۔