لاہور : رمضان المبارک کا دوسرا عشرہ آج اختتام پذیر ہوگا، اور ملک بھر کی مساجد میں اعتکاف کی تیاریاں حتمی مراحل میں پہنچ چکی ہیں۔ اسلام آباد کی مساجد میں بھی اعتکاف کے انتظامات مکمل کر لیے گئے ہیں، اور ہزاروں کی تعداد میں مسلمان آج اعتکاف بیٹھیں گے۔
فیصل مسجد اور اسلام آباد کی دیگر مساجد میں اعتکاف کے انتظامات مکمل کیے گئے ہیں، جہاں فیصل مسجد میں 600 سے زائد افراد اعتکاف میں بیٹھیں گے۔ فیصل مسجد کی انتظامیہ نے بتایا کہ اس سال بھی اعتکاف بیٹھنے والوں سے کوئی فیس نہیں لی گئی، اور ان کے کھانے پینے کے لیے مسجد کے احاطے میں سٹال لگا دیے گئے ہیں۔ علاوہ ازیں، فیصل مسجد میں آخری عشرے میں قیام اللیل کا بھی انتظام کیا گیا ہے۔
لاہور میں داتا دربار میں اعتکاف کے لیے محکمہ اوقاف نے معتکفین کی فہرست جاری کر دی ہے، جسے احاطہ دربار میں آویزاں کر دیا گیا ہے۔ ایڈمنسٹریٹر داتا دربار شیخ جمیل نے بتایا کہ سپیشل برانچ سے کلیئرنس ملنے والے افراد کے نام فہرست میں شامل کیے گئے ہیں۔ انتظامیہ نے 1600 افراد کے ناموں کی فہرست آویزاں کی ہے، اور ان کے لیے طعام و قیام کے انتظامات 4 سیکٹرز میں کیے گئے ہیں، جہاں ہر سیکٹر میں 102 کیبن ہوں گے۔ ہر شہری کے سیکیورٹی کارڈ پر اس کے کیبن کا نمبر درج ہو گا۔
