ڈیرہ اسماعیل خان: سکیورٹی فورسز کے آپریشن میں 10 خوارج ہلاک ہوگئے جبکہ دہشت گردوں کی فائرنگ سے پاک فوج کے کیپٹن حسنین اختر شہید ہوگئے۔
آئی ایس پی آر کے مطابق، سکیورٹی فورسز نے ڈیرہ اسماعیل خان میں خفیہ اطلاعات پر آپریشن کیا، جس میں 10 دہشت گرد ہلاک ہوئے۔ فائرنگ کے تبادلے میں کیپٹن حسنین اختر نے جام شہادت نوش کیا۔
آئی ایس پی آر کے مطابق، آپریشن کے دوران ہلاک ہونے والے دہشت گردوں سے ہتھیار اور گولا بارود برآمد کیا گیا، اور یہ دہشت گرد متعدد دہشت گردی کی کارروائیوں میں ملوث تھے، جن میں بے گناہ شہریوں کی ٹارگٹ کلنگ بھی شامل تھی۔
آئی ایس پی آر نے مزید بتایا کہ علاقے میں دیگر ممکنہ دہشت گردوں کے خاتمے کے لیے کلیئرنس آپریشن جاری ہے۔
کیپٹن حسنین اختر شہید کا تعلق ضلع جہلم سے تھا اور انہوں نے 4 سال تک دفاع وطن کا فریضہ سرانجام دیا۔ وہ اپنے پیچھے والدین اور بہن بھائیوں کو سوگوار چھوڑ گئے ہیں۔