تہران: ایران کے سپریم لیڈر آیت اللہ خامنہ ای کا کہنا ہےکہ امریکی وعدے ایران کے لیے قابل بھروسہ نہیں اور امریکی پابندیوں کے مکمل خاتمے کے بعد ہی ایران جوہری معاہدے کی پاسداری پر واپس آئے گا۔
سرکاری ٹی وی پر خطاب میں آیت اللہ خامنہ ای کا کہنا تھا کہ ایران کے لیے امریکی وعدے قابل اعتبار نہیں ہیں اور ایران نے اوباما دور میں امریکا پر اعتماد کیا جبکہ وعدوں کی پاسداری کی لیکن امریکا نے اعتماد توڑا ۔
آیت اللہ خامنہ ای کا کہنا تھا کہ امریکی صرف کاغذات میں پابندیاں ختم کرنے کا کہتے ہیں اور عملی طور پر ایسا نہیں کرتے اور امریکا پابندیاں مکمل ختم کرے ہم اس کی تصدیق کریں گے۔
ان کا کہنا تھا کہ اگر حقیقتاً ایسا ہوا تو ایران کو جوہری معاہدےکی پاسداری پر واپس آنے میں کوئی مشکل نہیں ہو گی۔
گزشتہ دنوں یورپی پالیسی مرکز میں خطاب کرتے ہوئے ایرانی وزیر خارجہ جواد ظریف نے کہا تھا کہ رواں سال جون میں ایران کے صدارتی انتخابات سے قبل امریکا کے پاس جوہری معاہدے سے متعلق ڈیل کرنے کا وقت ہے لیکن اور اس حوالے سے امریکا کو جلدی کرنا پڑے گی ورنہ دوبارہ معاہدے میں شامل ہونے کے لیے اگلے سال تک انتظار کرنا پڑے گا۔
جواد ظریف نے کہا کہ جوبائیڈن انتظامیہ نے ابھی تک ٹرمپ دور کے فیصلوں سے کچھ ہٹ کر نہیں کیا اور معاہدے میں واپسی سے متعلق ہمارا صرف ایک ہی مطالبہ ہے کہ امریکا بات چیت سے قبل جوہری معاہدے کی پاسداری کرتے ہوئے ٹرمپ کی جانب سے ایران پر عائد پابندیوں کو ختم کرے ۔
یاد رہے کہ 2015 میں امریکا نے ایران کو جوہری ہتھیار سے روکنے کےلیے چند یورپین ممالک کے ساتھ ملکر ایران کے ساتھ جوہری معاہدہ کیا تھا تاہم 2018 میں ڈونلڈ ٹرمپ نے یک طرف فیصلہ کرتے ہوئے معاہدہ ختم کردیا تھا اور ایران پر دوبارہ پابندیاں عائد کردی تھیں ۔
دوسری جانب جوبائیڈن نے امریکا کا صدر منتخب ہونے سے پہلے ہی ایران کے ساتھ جوہری معاہدہ دوبارہ شروع کرنے کا اشارہ دے دیا تھا اور بعد ازاں وہ واضح کرچکے ہیں کہ ایران جوہری معاہدے کی شرائط پر عمل کرتے تو امریکا دوبارہ اس معاہدے میں شامل ہوجائے گا تاہم ایران نے پہلے تمام پابندیاں ختم کرنے کی شرط عائد کر رکھی ہے۔
