کیپ ٹائون:جنوبی افریقہ کے زولو بادشاہ میسوزولو کازولیتینی کی پہلی اہلیہ، ملکہ اینتوکوزو، اپنے شوہر کی تیسری شادی کو روکنے میں کامیاب نہ ہو سکیں۔ ملکہ نے بادشاہ کی تیسری شادی کو روکنے کے لیے عدالت سے رجوع کیا تھا، تاہم عدالت نے اس درخواست کو مسترد کرتے ہوئے بادشاہ کے حق میں فیصلہ سنایا۔
بادشاہ میسوزولو کی تیسری شادی اگلے ہفتے متوقع ہے، جسے روکنے کی کوشش میں ملکہ نے قانونی راستہ اختیار کیا تھا۔ لیکن عدالت نے فیصلہ دیا کہ چونکہ ملکہ نے پہلے ہی بادشاہ کی دوسری شادی پر اعتراض نہیں کیا تھا اور اس کے لیے اپنی رضامندی ظاہر کی تھی، اس لیے وہ تیسری شادی کو روکنے کی درخواست نہیں کر سکتیں۔
جنوبی افریقہ میں ایک سے زائد شادیوں کو روایتی طور پر قانونی طور پر تسلیم کیا جاتا ہے، بشرطیکہ وہ مقامی حکام کے ساتھ رجسٹرڈ ہوں۔ بادشاہ میسوزولو نے 2022 میں اپنی دوسری شادی کی تھی، جس پر ملکہ نے کوئی اعتراض نہیں کیا تھا۔
بادشاہ کی تیسری دلہن، نومزامو میینی، نے اس بارے میں کہا کہ وہ اس معاملے کے بارے میں کچھ نہیں جانتیں اور ان کی شادی کے انعقاد میں کسی قسم کی رکاوٹ نہیں آئے گی۔
